Website Traffic Tracking
Falam Baptist Church Thuanthu

Hmaisabik ah FBC,M  kawhhran a dintu, in kaihruaitu, le in kaihruai vivo laitu kan Pathian hmin kan thangthat. FBC, M  Kawhhran cu Pathian cungnungbik ah ret in a hmin sunlawinak hrangah theitawp suahih hnatuan dingin dinmi a si. Pathian kut cak ringih fehmi Kawhhran a si. Amah Pathian in in sersiam dan Lai (Falam) nunphung, calai, ṭong, le USA nundan khal thlauthla loin Pathian kan biak theinak ding tumtahnak thupi thawn a fehmi Kawhhran a si. FBC,M cu Falam tong a hmangmi Kawhhran a si.

2000 hlan thu


Kum 2000 hlan ihsin laimi pawl cu USA hmun kipah thuhla a phunphun in a rak thlengtu an um. Cu tivek thotho in National Capital Area (DC Area) le Frederick khua khalah Laimi hrekkhat a rak thleng tu an um. Mah le remtinak cio ah Pathian biak khawmnak an rak hawl. Laimi pawlih Pathian biak khawmnak a rak um nan Lai (Falam) tong hmannak kawhhran a rak um lo.

Kum 2000 hnu;  
Pathian khawkhan remruatnak ruangah Laimi pawl cu Kawlram ihsin USA ah kum 2000 hnu lamah a vai mi kan tam vivo. Zumtu pawl cun kan thlen ve ten mah le remcannak hmun cio ah Pathian biaknak hmun kan rak hawl. Hi laiah Laimi  kan rak khawmnak hmun pawl cu Mirang kawhhran hrekkhat (Mirang tong), Roman Chatholic (Mirang tong), Mizo SDA Church (Mizo tong), First Mizo SDA Church (Mizo tong), Mizo Presbyterian Church (Mizo Ṭong), Calvary Baptist Church (Kawl Ṭong), Gospel Baptist Church (Kawl tong),  Chin Baptist Mission Church (Hakha tong), Lai Baptist Church (Hakha tong), pawl an si. Falam mi tamsawn cu Gospel Baptist Church ah kan khawm. DC Area sungah  Falam tongih Pathian biaknak hmun a um lo ruangah mi tong hmangih Pathian biak khawmnak hmunah kan rak lawi cio. Asinan saduhthat lungphum in kan um thei ngaingai lo. Amah kan Pathian ih in rak pekmi kan mai tongih Pathian biak thei ding cu kan saduhthah ah a rak tum bik ringring.

Saduh thah; 
Frederick khua ih a thlengtu Lai (Falam)mi kan tam deuhdeuh tikah kan upa pawlin a vakvai rero mi nau le pawl cu in zangfah zet. Upa hrekkhat thinlung sungah mai’ tong te ih Pathian biakduhnak cu a thanglian vivo. Kan tefa pawl kan zoh tikah a rei hlanah mirang tong in an tong dingih kan tong cu an hngilh thluh mai ding ti cu fiang zetin a lang. Tesin fa pawlin kan tong hi thiam ringring hai sehla, in sersiamtu Pathian ih in pekmi tong, nunphung, le calai tla kan neive a si timi thei in Pathian thangthatnak cang thiam ringring haiseh ti  khal saduhthah nak a tum zet. Cuti cun aw-lawksong in ziangtik ah kan ding suak ve thei pei tiah khuaram thlir in kan rak um.

Kawhhran a ding; 
Siangbawi Rev. Dr. S. Hre Kio le a nupi Pi Tlem Tsin ih thinlung sungah Pathian in hna a tuanih Frederick khua ah a rak thlah. July 18, 2004 Sunday zanah Pu Ni Cem Lyan tei inn (1028 Chinabery Dr, Frederick, MD 21703) ah Pathian biak khawmnak kan nei. Siangbawi pa in Chin (Falam) tong in Pathian biakkhawmnak (Kawhhran) din a tul timi  thu in sim in forh. A khawmtu hmuahhmuah khalin lungkimnak thu le hmuh ton ruahdan rel fingfing a si hnuah mi tamsawn ih duh danin kan feh a si. Hi zan ah Siangbawi  Rev. Dr S. Hre Kio ih hohanak in Falam Baptist Church, Maryland (FBC,M) tiah Kawhhran hmin bunin kawhhran kan ding a si. Rev. Dr. S. Hre Kio cu kawhhran dinpitu kan pa bik a si.

Pehzom in Rev. Biak Ceu ih hohanak in July 23 Friday le July 24 Saturday khalah tonkhawm awknak  nei in hruaitu hril dan ding pawl relkhawmnak kan nei, hmailam kan ke kardan ding pawl le dan le dun pawl ruang kan zing vvivo a si.

Khawm hmaisa bik ni; 
July 25, 2004 Sunday sun ah Pu Ni Cem Lyan tei inn (1028 Chinabery Dr, Frederick, MD 21703),  ah a hmaisabik  khawm kan thok a si. Kawhhran hruaitu ding pawl khal kan hrilih tuanvo zemawknak kan nei. Rev. Biak Ceu in Pathian hmin in thlawsuah malsawm peknak a nei. Thawhhlawm $ 90 kan ngah ih then hra thenkhat $ 200 kan ngah.

Hmaisa bik FBC, M kawhhran hruaitu (Ruangzingtu) pawl;

Pu Lal Nei Mang            Hotu                      (Chairman)     
Pu Khuah Ling Mang     Hotu bawmtu        (Vice Chair)      
Pu Thang Hook Lyan     Sungtuan               (Secretary)         
Pu Biak Kim Lian           Sungtuan bawmtu (Asst Sec)          
Pi Khuang Lian Par        Sum kiltu               (Treasurer)       
Pi Ngun Sin Sung           Sum kil bawmtu    (Asst Trea)       
Pu Sui Luai                     Thangphawktu      (Communicator)
Salai Za San Oo              Zohfeltu                (Auditor)    
Pi Run Nei Kim              Zohfeltu                (Auditor)

Hi ni ah sungtel zaten mi 22 kan si.

Atlanta Chin Baptist Church le Rev Biak Ceu  hnenih lungawi thu; 

Rev. Biak Ceu cu Atlanta Chin Baptist Church ( ACBC ) ih pastor ṭuan lai a si nan FBC, M cu pastor nei lo, Kawhhran ding pekte kan si ruangah thu tul tinkim in tawlrel pi dingin ACBC hnenah kan dil. Kan dilnak cu in pom sak tlunah Rev. Biak Ceu cu a mal bik thlakhat vawikhat tal FBC, M  hung vehvai dingin in sian sak a si,  a vanzam tiket man khal anmah ACBC in an tum. Rev. Biak Ceu ih hoha nak in Kawhhran fehdan kan zir ih kaihhruai awknak dan tlangpi (Constitution) khal tuah a si. ACBC le an Pastor Rev. Biak Ceu hi FBC,M din tikah pa bik din hmunah dingin in cangcawitu an si. An parah kan lung a awi. Pathian in thlawsuah pe vivo hramseh tiah thla kan cam sak.

Thlacamnak;   
Kawhhran a din ruangah thlacam a tul ti cu Pathian in in theihter. August 1, 2004 Sunday ni ihsin Kawhhran thlacamnak kan thok a si. Pi Ngun Sin Sung cu thlacam hohatu dingah tuanvo kan pek. Tu-ah cun Nubu hohanak in a rung feh vivo ih Pathian lam hruainak in tuisun ni tiang pelh lo ten kan peh thei ringring ruangah sunlawinak cu Pathian hnenah kan hlan a si.

DCBC thawn pehtlaihnak thu;
Kawlram ih sin kan rat laiah kawhhran phunkim ih sin a ra mi kan si nan USA ram mi kan si zo ih lungrual ten kawhhran pakhat ah kan ding tlang a si. Zommi felfai kan neih a tul tin kan ruat ruangah kan hmin  hi Falam Baptist church kan tinak a si. August, 2004 ihsin DCBC kan zom a si. DCBC zom thu ah siseh, Biak inn hawl thu ah siseh,  Government ih Register tuah thu ah siseh, thu tul dangdang ah siseh, ziangkim in tawlrel pitu le biak inn lam khalah can in hmansak theutu LBC Pastor Rev. Rolin Vanbik hnen ah kan lung a awi zet.

Nauhak Sunday School; 
August 15, 2004 Sunday ih sin FBC,M Nauhak Sunday School kan thok. Zirhtu dingah Mai Aye Cin kan hril.  A zirtu fa le pawl cu Linda Aung, Hing Thet Aung, Chery Aung, Cung Za Lal, Ni Siang cin le Lindsey Zaiang Lian pawl an si.
Tikcu a rei deuh hnuah tleirawl pawl khal kan bet sal leh a si.

Christmas;
2004 Christmas cu Pu Khuah Ling Mang te in Vokthau sumnga an thawh ih Kawhhran mi kan zate le laicin unau dang sawm khawm in FBC,M kawhhran hmin in a hmaisabiknak Christmas cu nuam zetin kan hmang tlang a si.

Bebruary 28, 2005 ah Pu Phun Kar Thang, Pu Khuang Lian Mang le Pu Sai Aung Aung  cu FBC,M Church hruaitu ah kan bet sal a si.

Khawmnak Biak inn kan nei;

August 2004 lai ihsin Nipi ni Biakinn khawmnak ding hawl kan thok. Nipi ni (Sunday)
khawmnak ding biakinn kan neih lo ruangah inn tin te a haha in kan khawm theu. District of Columbia Baptist Convention DCBC ihsin Dr. Robert D. Cochran, A-G/S (Principal Coordinator/Consultant, Center for Congregational Health, Evangelism & Discipleship cu  Frederick ah ra in kan khawmnak ding biakinn in hawl pi theu. Biak inn tam nawn kan sut tikah lungawi ten in rak hmuak cio nan khawm tikcu hman duhmi a rem aw theilo. Ambassador Baptist Church kan thlen tikah Pastor Tom Fry kan tong, lungawi sopar ten in rak hmuak. Biakinn cu man pek tul loin nan hmang thei a si tiah in ti. Hi thu kan theih tikah kan lung a awi Pathian hmin kan thangthat.  Dr. Robert D. Cochran le Pastor Tom Fry parah lungawi thu kan sim a si. Khami sun ah Pastor Tom Fry cu Jesuh vekin lettama thilri kengin biakinn a rak sak rero lai a si. Jesuh ih mithmai kengin ka rak hmu ih tui ni tiang ka mitthlam ah a hlo thei lo. A zaidam dan le a ṭongkam nemte kha mina pawl hman damnak tlak a si tiah ka hmu.

Biakinn ah khawm kan thok;
March 6, 2005 Sunday sun hi Ambassador Baptist Church Biak inn ih kan khawm hmaisabik sun a si. FBC,M le Ambassador Baptist Church cu combine service kan nei. FBC,M in suncaw kan do ih kan ei tlang. Pathian ruangah kan lung a awi tlang zet. March 13, 2005,  1:00 – 3:00 pm ihsin kan mahte kan khawm thok. March 20, 2005 Sunday ah khawm on puai kan tuah. Kan khawm thok ih sin tuini tiang Pathian lam hruainak in kan khawm thei ringring a si. April 30, 2005 Saturday ah FBC,M kawhhran “Ruangzingtu” timi cu kan cemter ih Deacon rule ih feh dingin kan rel. FBC,M Constitution le bylaw kan tuahmi cu kan nemhnget ih kan hmang cih a si.

Part time in pastor kan nei;
Pastor San No Thuan cu Lutheran Theological Seminary at Philadelphia ah Ph.D zir in tlawng a kai laiah FBC,M  kawhhran in ra tlawng, in ra vehvai, in ra kaihruai,  ringring tu a si. FBC, M ah part time in Pastor tuan dingih kan biak tikah Pathian mithmai zoh in lungawi ten in pom sak. Seprember 17, 2004 Friday EC meeting ah FBC, M  part time pastor dingah kan nemhnget a si. A man remcang tiktik ah in ra tlawng dingin kan lung a kim. Pathian duhdawt le FBC,M kawhhran tuu rual pawl a duhdawt ruangah a rak tlawng thei ringring ih kawhhran kan thla a tlung zet. October 15, 2005 Sunday ni hi kawhhran zaten rawltawm zanriah ei tlangnak thawn kan khawmpi hmaisabik ni a si.

Pathian thu ih in cawmtu pawl;
Pathian in a mi pawl hmangin FBC, M cu thu le hla in a cawm a si. Nipi sun ih Sermon tu dingah kanmai kawhhran sungih upa pawl, kiangkap ih pastor pawl, hmundang ramdang ih sin in ra tlawngtu pawl, le kiangkap ih um kawhhran dang upa pawl hmangin Pathian in a thu in in cawm a si. Pathian thu ih in cawmtu pawl parah lungawi thu kan sim, Pathian in malza sawm hram seh tiah kawhhran in thla kan cam sak.

Satan thawn doawknak;
FBC, M cu Pathian sunlawinak hrangih a din ruangah satan kan ralpa cu siatsuah dan ding hawlin fim hrokhrol zetin tan a la ve. Asinan Pathian rinsan in thlacamnak thawn a fehmi kawhhran a si ih Pathian cahnak huham thawn kilhim mi a si ruangah tuini tiang tluang zetin kan feh thei a si. A ralai dingmi tikcu le can hmuahhmuah khal Pathian  hnenah kan ap ih in hruai vivo lai ding a si ti zumnak in kan hmuh ruangah Pathian hnenah lungawi thu kan sim a si.

Tihnimnak (Baptism)
September 24, 2006 ni ah FBC, M Kawhhran sungin mi 5 in Pastor Tom Fry hmangin Tihnimnak (Baptism) an la a si.

December 6, 2005 ah hmaikum 2006 FBC, M hruaitu ding hrilawknak kan nei a si.

Pu Lal Nei Mang               Hotu                      (Chairman) 
Pu Khuah Ling Mang        Hotu bawmtu        (Vice Chair)       
Pu Biak Kim Lian              Sungtuan               (Secretary)         
Pu Sui Luai                        Sungtuan bawmtu (Asst Sec)         
Pu Thang Hook Lyan        Sum kiltu               (Treasurer)      
Pu Khuang Lian Mang      Sum kil bawmtu    (Asst Trea)     
Pu Phun Kar Thang           Elder
Pu Za Hlei Thang              Elder   
Pu Sai Aung Aung            Elder  
Pu Ngun Kip Sang            Zohfeltu                 (Auditor)   
Salai Ngun Thawng Luai  Zohfeltu                  (Auditor)

December 30, 2005 ni ah 2006 FBC, M Nubu le Mino hruaitu ding kan hril.

2006 FBC, M Nubu Hruaitu ding pawl

Pi Ni Tang                Hotu                      (Chairman) 
Pi Ni Dong               Hotu bawmtu        (Vice Chair)       
Pi Run Nei Kim       Sungtuan               (Secretary)         
PI Hlawn Kip Cer    Sungtuan bawmtu (Asst Sec)         
Pi Ni Hniang            
Pi Ngun Sin Sung    
Pi Khuang Lian Par
Pi Sui Par

2006 FBC, M Mino hruaitu ding pawl

Salai Sui Nei Ceu      Hotu                      (Chairman) 
Salai Tha Sin Mang  Hotu bawmtu         (Vice Chair)       
Mai Aye cin              Sungtuan                (Secretary)         
Mai Hrang Em Par    Sungtuan bawmtu  (Asst Sec)         
Salai Cungmi Mang 
Salai Lal Cung Luai    
Salai Za Lian Maw
Salai Fung Lian
Mai Thliasin Mang

Veng khawm (Home Cell)
January, 2006 in vengkhawm (Home Cell) kan thok ih Nubu le Mino hohanak in kan feh. Nithum (Wednesday) zan tinte kan tuah. Tawkfang a rei hnuah Ninga (Friday) ah kan thawn sal. Pathian lam hruainak in kan phur khawm zetih tuisun ni tiang lungawi sopar ten Pathian kan thang that thei.

Church Moto;
May 17, 2006 ah Church Moto Bible catlang hrilnak kan nei.
“ Aram le a felnak hawl hmaisa aw ”  timi Mate  6:33 kan hril.

2007 – 2008  FBC, M   Pawlpi hruaitu (Deacons) pawl.

Pu Phun Kar Thang          Hotu                      (Chairman)     
Pu Dr. Za Hlei Thang       Hotu bawmtu        (Vice Chair)      
Pu Lal Nei Mang              Sungtuan               (Secretary)         
Pu Khuang Lian Mang     Sungtuan bawmtu (Asst Sec)          
Pu Khuah Ling Mang       Sum kiltu               (Treasurer)       
Salai Ngun Thawng Luai  Sum kil bawmtu    (Asst Trea)       
Pu Hook Luai                    Zohfeltu                (Auditor)    
Pu Ngun Kip Sang            Zohfeltu                (Auditor)

2007 – 2008  FBC, M  Nubu hruaitu pawl

Pi Ni Tang                     Hotu                      (Chairman) 
Pi Ni Dong                    Hotu bawmtu        (Vice Chair)       
Pi Run Nei Kim             Sungtuan               (Secretary)         
PI Hlawn Kip Cer         Sungtuan bawmtu (Asst Sec)         
Pi Khuang Lian Par       Member        
Pi Ni Hniang                     =
Pi Sui Par                          =
Pi Ngun Sin Sung             =
Pi Dr. Kyaw May Htwe   =

2007 – 2008  FBC, M Mino hruaitu pawl

Pu Sui Luai              Thuron                   (Advisor)
Salai Sui Nei Ceu     Hotu                      (Chairman) 
Salai Lai Lian           Hotu bawmtu         (Vice Chair)       
Mai Hrang Em Par   Sungtuan                (Secretary)         
Salai Cungmi Mang  Sungtuan bawmtu  (Asst Sec)             
Salai Za Lian Maw
Mai sung tin Mawi
Salai Fung Lian
Salai Lal Cung Luai
Mai Thliasin Mang

April 23, 2007 ah Mission thlah ding thu kan rel ih 2007 kum ih sin thok dingin kan rel. Mission kan thlah zomi pawl cu;

Kum   No.  Hmin                Umnak Khua                    Mission Field   Thlahtu

2007.  1. U Ti Htwin We                                            Pagogo           Pawlpi
2008.  1. Thang No            Phiodunkhi,                      Yaw Field       Pawlpi
...........2. Khin Mala           Kalewah,                          Chindwen       Pawlpi  
2009.  1. Khin Mala           Kyohka, Kalaywah Area  Chindwen        Pawlpi
...........2. Singkiling                       Innyouathit             Chindwen        Pawlpi
...........3.. Pastor Cin Khan Suan  Phawngpin Area     Chindwin         Pawlpi     
...........4. Lian Zam Cing               Phawngpin Area     Chindwin         Nubu
...........5. Pastor Fung Nei Kulh.   Phawngpin Area     Chindwen        Mino

Thuthangṭha ruaipi (Camping) neih mi pawl;

July 26 -28 2007      Camp Misty Mount, Thurmont
Zirhtu saya pawl:    1. Rev. Khuang Lian Kap
2. Pastor San No Thuan
3. Sayamah Karen Sui Cer  tla an si.

August 15 - 17, 2008   Camp Round Meadow,
Catoctin Mountain Park, Frederick, Maryland    
Zirhtu (Speaker)           Rev. Hrang Kip Zul

July 17 – 19, 2009       Camp Round Meadow,
Catoctin Mountain Park, Frederick, Maryland    
Zirhtu  (Speaker)          Pastor San No Thuan

Hla Cabu;
FBC,M kan din veten ACBC in ṭhangphawknak hla cabu le Christian hlabu (Hymn Book) in ṭhen. Khristian hlabu kan rak ken cio mi kan thawh khawm bet ih a zaten bu 10 lenglo kan nei thei ih tawkfang kan hmang. Mi kan hnihthum vivo ih hla cabu kan daih awk tuk lo ruangah Aye Cin tei sungin Christian hlabu bu 40 (Hla fing 500 um) Kawlram ah an cahih kawhhran an hlu. Pu Hrang Mang ten a-lak in in rak phurhsak. 
Cui hnuah Falam milesa pawl ir-awmsuak phuahmi ṭhangphawnak hla bute bu 40 (hla fing 200 um) an cah sal lala ih kan duh zet. Mai Hrang Em Par te in in rak phurh sak. Hi hla bute sungah ṭhangphawknak hla lehmi pawl, hla ṭhaṭha a tel lo ruangah Delhi Christian Fellowship pawl ih tuahmi hlabu bu 50 (Hla fing 400 um) Kawhhran in kan cah sal ih kan hmang. Biakinn khawm ah Christian hlabu le ṭhangphawknak hla pahnih in kan hmang. 2008 kum thok in Hla cauk hmang nawn loin Power point hmangin kan khawm. Delhi ih kan cahmi hlabu cu Vengkhawm ah kan hmang.

Gospel team kan feh;
May 23 Friday zan Atlanta panin kan pok ih ACBC ah Gospel team kan feh. 
May 24 le 25 hi sunzan in Pathian thu le hla thawn Pawl kom awknak kan nei. 
Hi tum ah Association din thok a si ih a hmin ah “Chin Baptist Association, USA”  ti a si. ACBC le FBC, M  Kawhhran pahnihlawng kan si hrih. Pathian in Kawhhran tam sisin in pe leh ding ti zumnak thawn thla kan cam a si.

Full time Pastor kan nei;
Pastor San No Thuan cu Ph.D a Thesis ngan sung FBC, M Kawhhran ah Full time Pastor ra ṭuan dingin kan Chaiman Pu Phun Kar Thang in a rak bia. Rem a ti thu October 26, 2008 Kawhhran Deacons meeting ah simthannak a nei. Lungawi ten kan pom ih nemhnget nak kan nei. November 2, 2008 Sunday sun khawmah sempi hnenah than/theihternak kan nei.

2009 – 20010  FBC, M hruaitu pawl. (Deacons)

Pu Phun Kar Thang          Hotu                      (Chairman)     
Pu Dr. Za Hlei Thang       Hotu bawmtu        (Vice Chair)      
Pu Lal Nei Mang             Sungtuan               (Secretary)         
Pu Khuang Lian Mang     Sungtuan bawmtu (Asst Sec)          
Pu Khuah Ling Mang       Sum kiltu               (Treasurer)       
Salai Ngun Thawng Luai  Sum kil bawmtu    (Asst Trea)       
Pu Hook Luai                  Zohfeltu                (Auditor)    
Pu Ngun Kip Sang           Zohfeltu                (Auditor)
Rev. Khuang Lian Kap    Tlangsuak upa       ( Deacon)
Pu Sai Aung Aung           =                              =
Pu Sui Luai                      =                              =
Pu Biak Kim Lian            =                              =

*** Rev Khuang Lian Kap cu  July 9, 2009 ah Pathian hnenih in feh san ruangah
Pu Than Kip Luai cu Deacon tharah kan hril sal a si.

2009 – 20010  FBC, M  Nubu hruaitu pawl

Pi Run Nei Kim               Hotu                    (Chairman) 
Pi Dr. Kyaw May Htwe  Hotu bawmtu       (Vice Chair)       
Pi Lal Nei Kil                  Sungtuan              (Secretary)         
PI Ni Lian Kil                 Sungtuan bawmtu (Asst Sec)  
Pi Ngun Sin Sung            Sum kiltu
Pi Hlawn Kip Cer           Sum kil bawmtu        
Pi Ni Hniang                   Member        
Pi Sui Par                            =
Pi Khuang Lian Par            =
Pi Ni Dong                         =
Pi Ni Tang                          =
Pi Ngun Zi                          =

2009 – 20010  FBC, M Mino hruaitu pawl

Pu Sui Luai              Thuron                             (Advisor)
Salai Za Lian Maw  Thuron&Thlungdar hotu) (Advisor&Music leader)

Salai Tha Sin Mang    Hotu                      (Chairman) 
Mai Hrang Em Par      Hotu bawmtu         (Vice Chair)       
Salai Lai Lian             Sungtuan                (Secretary)         
Salai Lal Ruat Thang  Sungtuan bawmtu  (Asst Sec)  (MaRuat)            
Mai Sung tin Mawi     Sum kiltu               (Treasurer)
Mai Thlia Sin Mang    Sum kil bawamtu  (Asst Treasurer)
Salai Lal Ruat Thang   Hla zirhtu

Salai Fung Lian            Thlungdar Kiltu    
Salai Lal Hu Lian                =
Salai Ram Tin Thang          =

Salai Thasin mang          Music player
Salai Fung Lian                    =
Salai Lai Lian Thang            =              

Mai Mang Ee Cin            Pray and Worship hla hriltu
Mai Thliasin Mang                =

Salai Cungmi Mang          Members
Salai Cung San                      =
Salai Lal Pek Mawi               =         
Mai Van Kip Par                   =
Mai Ruth Baby Zo Tluang    =

FBC, M in Motor kan lei;
February 2009 ah FBC, M in Toyota Siena (2009) van motor kan lei a si. Kawhhran thu ṭul le Pastor hman dingah tiah kawhhran in a rel.

Pastor in Full time in in umpi;
October 2008 ah Full time in Kawhhran in a nemhnget zomi cu tlawng lam thuhla a phunphun ruangah kan hnen ra thei lohli lo in a um. March 21, 209 ah kan hnenah a ra suak thei ih FBC, M Kawhhran mipi in Rawlṭawm zanriah einak le thule hla thawn kan rak hmuak a si.  Pastor kan neih tikah Pathian thu le hla ah kan thangso nasa.

April 4, 2009 ah Charlote Chin Christian Church ah Gospel kan feh.  Kawhhran thar Biakinn on phah tla cem a si ih ACBC lam khalin an ra ve. Kawhhran pathum kan khawm tlangih kan nuam nasa. Sunlawinak cu Pathian hnenah kan hlan.

Church Record bu vekih ngan khummi a si ih a sual palhnak a um pang le in ngaithiam dingin ka lo dil duh a si. Ka lung a asi.

Pu Lal Nei Mang
Sungtuan
FBC,M